Թաեքվոնդո մարզաձևից Եվրոպայի կրկնակի չեմպիոն, օլիմպիական խաղերի մասնակից Արման Երեմյանի հետքերով է գնում նրա 15 –ամյա որդի և սան  Ստեփանը: Լոս Անջելեսում անցկացված   << Օլիմպիական հույսեր >>  միջազգային փառատոնում, Հայաստանի դրոշի ներքո հանդես եկող հայ պատանին, 63 կգ քաշային կարգում,  հինգ հաղթական մենամարտ անցկացրեց և նվաճեց չեմպիոնի կոչումը:

ՀՀ թաեքվոնդոյի ֆեդերացիայի նախագահ,  եվրոպական ասոցիացայի՝  արդարացի խաղի և էթիկայի հանձնաժողովի նախագահ Վարդան Ղահրամանյանը զրույցի ժամանակ ասաց, որ առայժմ մարզիկները պարապում են տեղերում՝ անձնական մարզիչների ղեկավարությամբ:

Հաջորդ ամսին Երևանում նշանակված է ՀՀ պատանեկան և երիտասարդական առաջնությունը, որի  արդյունքների հիման վրա կկազմավորվի հավաքական: Նպատակ կա հինգ մարզիկ գործուղել  Սկոպյեյում հուլիսին կայանալիք օլիմպիական պատանեկան փառատոն: